Haititempo.com te rankontre ak Polynice Auxerre ki se yon jèn foutbolè ayisyen ki pral fè yon staj nan Los Angeles Galaxy nan fen semèn nan. Polynice pale ak nou sou staj la e li pataje divès lòt enfòmasyon ak nou ankò.
Nou envite’w swiv entèvyou a!
HT: Bonjou Polynice, èske ou ka prezante tèt ou pou lektè Tempo yo?
PA: Mwen rele Polynice Auxerre, mwen te fèt Pòtoprens. Mwen te rete nan zòn Delma. Mwen kite Ayiti an 2007 a 14 zan pou’m ale Tallahassee, Florida. Mwen te lekòl Lise Petyon. Mwen te konn jwe chanpyona katye an Ayiti. Mwen te kòmanse jwe football depi mwen te gen 5 an. Mwen gradyé High school mwen Nan yon lekòl ki rele Amos P Godby High Nan Tallahassee, Florida. Mwen te jwe pou lekòl la Pou 4 an. Mwen te ranpòte anpil meday tankou meyè bitè elatriye. Kounye a m’ap jwe pou Tallahassee Community College.
HT: Ki pozisyon ou jwe?
PA: Mwen jwe kòm atakan ak milye ofansif.
HT: Ou nan inivèsite pou kounye a, ki plan ou genyen aprè sa?
PA: Mwen pral gradyé nan trimès k’ap vini an. Mwen ap etidye administrasyon. Mwen gen yon staj ak Los Angeles Galaxy, si mwen reyisi nan staj la mwen pral jwe pou klib profesyonèl la donk mwen pral fini etid la pa korespondans sou entènèt.
HT: Ki lè w’ap fe staj la?
PA: Samdi 23 ak dimanch 24 janvye nan vil Carson, California.
HT: Ki jan ou te arive dekwoche staj sa a ak LA Galaxy?
PA: Yon pwofesè nan inivèsite mwen an gen kontak avèk antrenè klèb la. Pwofesè a te wè mwen kap jwe deja nan lekòl la. Li te envite antrenè a pou li vin gade mwen kap jwe. Li wè mwen jwe byen donk li vle mwen al fè staj.
HT: Staj la se nan kèlke jou, èske ou santi ou pare pou li?
PA: Wi, mwen santi mwen pare paske mwen antrene anpil pandan 3 dènye mwa yo. Mwen ale kouri chak jou pou mwen ka gen anpil rezistans. Mwen jwe 5 fwa pa semèn pou mwen ka pi efikas epi pou mwen pa vin pi konfòtab avek balon an.
HT: Èske ou gen lòt staj ak lòt ekip aprè sa?
PA: Wi, mwen pral nan yon lòt staj an mas avèk Miami United Football Club.
HT: Ki jwè ki modèl ou? Ki ès ou panse ou jwe menm jan ak li?
PA: Modèl mwen se Ronaldinho avèk Neymar. Anpil zanmi avek lòt moun di mwen jwe menm jan avek Neymar.
HT: Èske ou pa entèrese reprezante seleksyon nasyonal la?
PA: Mwen panse ak sa anpil. Si yo ta ban mwen yon opòtinité pou mwen reprezante seleksyon nasyonal la mwen t’ap pran chans la.
HT: Tempo remèsye w epi nou swete’w bòn chans!
PA: Mèsi anpil. Mwen ap ba nou plis enfòmasyon aprè staj la.
—-
Reyalize pa Benson Petit-Clair pou haititempo.com
Home
Store
Contact