Nan okazyon 20tyèm edisyon mondyal FIFA a k’ap deroule nan peyi Brezil ane sa a, haititempo.com nan ap prezante yon ribrik kote staf sit la ap prezante opinyon yo sou divès pwen ki konsène gwo kokennchenn evenman sa a.
Pou kòmanse ak ribrik la, patisipan yo ap reponn 2 kesyon sou kriz ki gen nan peyi Brezil e opine sou enpak sa ka genyen sou mondyal la.
1. Eske pwobèlm ki genyen nan peyi Brezil yo ekyetew pou dewoulman mondyal la?
Michel Pierre-Louis: Pa vrèman. Anpil fwa lè pral gen jan de konpetisyon sa yo wap toujou jwenn anpil plenyen nan peyi k’ap akeyi evenman an. Soti depi nan stad ki poko pare, infrastrikti ki pa an plas toujou gen plenyen. Brezil te gen anpil plenyen kòm kwa peyi a ap depanse anpil kòb pou oganize evenman sa tandi ke gen anpil problèm nan peyi a, toujou gen anpil manifestasyon nan sans sa. Men mwen preske ka garantiw kou 12 jen rive, 4 h sonnen, tout bagay ap an plas e mondyal la ap deroule nòmalman. M prèske asire ke pandan 1 mwa konpetisyon an ka gen derapaj, men se pa nan yon nivo pou’n ta di pou’n enkyete.
Alix Seme: Wi, de sa mwen panse e sa m wè, Brezil te gen 7 lane depi li konnen ke lap òganize mondyal la. Li pa enkyete mwen nan yon pwen kote ke se youn nan bagay ki fè yo rekonèt Brezil se foutbòl.
Benson Petit-Clair: Yo banm anpil enkyetid. Pou mwen menm, m pa panse tout bagay ap pase 100% an byen. Mwen menm panse ke Afrik di Sid (ki te fè mondyal 2010 la) ap bat Brezil an tèm òganizasyon. Brezil se yon gwo peyi ni nan sipefisi, ni nan kapasite ekonomik, men yo gen anpil pwoblèm ke gouvènman lokal la ak sektè prive a pa ko ka rezoud. Pèp la leve kanpe lè yo wè ki kantite kòb kap depanse nan estad ak kek lòt enfrastikti epi pwoblèm fondamantal yo rete san rezoud. Epi lòt pwoblèm ki bay kè sote ankò, komanw ta vle gen stad ki pat ko pare a la vèy mondyal la?
Gary Eliezer: Pa tèlman, si map pran dènye sondaj yo, nonb de moun ki pou mondyal la fèt toujou plis ke valè ki pa ta renmen li fèt epi pa bliye Brezil se peyi foutbòl, nan koup konfederasyon an te gen menm pwoblèm sa yo tou, men lè brezil te chanpyon tout brezilyen te pran lari ap fete.
Guerby Meyer: Wi mwen enkyè pou pwoblèm sa yo kap repete nan peyi brezil paske seri manifestasyon sa yo ap teni imaj peyi ya.
2. Eskew panse FIFA ak Gouvenman brezilyen an te ka evite pwoblèm yo?
Michel Pierre-Louis: Si se de pwoblèm nou sot site yo wap pale, mwen pa kwè li tap janm posib a 100% pou ke fifa ak gouvènman brezilyen an ta evite yo. Si nap pale de brezilyen ki pa dakò pou peyi a ap depense kalite kòb sa yo pou fè mondyal la tandi ke peyi a gen problem, sèl jan pou yo ta evite pwoblèm sa se ta pou ranje peyi a. Lol. Mwen pa kwè ap gen on peyi sou latè kote se peyi a ki ap investi jan de lajan sa pou yon evenmen kap dire sèlman 1 mwa, ke ou pap jwenn moun nan peyi sa kap plenyen. Yap toujou panse ke kòb sa te ka fe on lòt bagay pi enpòtan nan peyi a. Brèf, nan tout bagay fok gen konpwomi. Si la majorite brezilyen te kontan ke yap organize mondial la, se pa kounye a pou yo ap tire pye. Se pa jodia a Brezil gen problem e se pa jodi a yo vin konen ke tout kòb sa yo pral depense.
Alix Seme: FIFA ak Gouvenman Brezil la paka evite pwoblèm yo, tout moun pa renmen football, men tout moun gen menm dwa.
Benson Petit-Clair: Wi, gen efò ki te ka fet nan sans sa a pou evite ou diminye nan pwoblèm yo. Egzamp, m panse gouvènman an te ka fe yon kanpay de sansibilizasyon pou moutre moun yo ki sa envistisman yo ka itil peyi a, e yo te ka moutre yo tou enpak ekonomik mondyal la paske sa ap atire anpil touris, daye tout le mond pral branche sou Brezil. Yon lot bagay ankò ki enpòtan, Brezil pral gen pou organize je olenmpik nan 2016, donk yon move prestasyon nan oganizasyon mondyal la ka gen gwo enpak sou Je olenmpik la e kapasite peyi a pou l òganize lòt gwo evenman. Pou fini, m panse sektè prive a te ka fe plis efò nan konstriksyon stad yo paske sa ta ka soulaje mwens pwotès, e gouvènman lokal la ta depanse mwens kòb pou mondyal la. Kòb sa yo te ka al fe pwojè pèp la ap reklame yo.
Gary Eliezer: Yo toujou di dirije se prevwa, nan sans sa mwen te ka di wi yo te ka evite li ; men sa moun yo ap mande a tou, èske gouvenman brezilyen an te kapab satisfè yo ? paske pou mondyal la fèt, sa mande anpil lajan, e pèp la ap mande ogmantasyon, yo ap plenyen pou yon pakèt lòt pwoblem, kidonk gouvènman an fe yon chwa, sitou chwa sa pap gen depans sèlman, li ap gen benefis tou.
Guerby Meyer: Wi, FIFA ak gouvènman brezil la te ka evite pwoblèm sa yo paske li pat enpòtan pou yo te konstwi 12 stad, epi la FIFA pat gen rezon poul te pran tout chanm otèl ki pi ba pri yo.
Home
Store
Contact